Nawillie sa pagsasayaw

Isang buwan na ang nakakalipas nang mapanood ng mga loyal viewers ng Willing Willie ang pagsasayaw ni Jan-Jan na, ayon na rin sa host nitong si Willie Revillame ay mala-macho dancer.

Hindi naman talaga ako nanonood ng Willing Willie. Nalaman ko lang ang nangyari sa mga nabasa kong news articles at posts sa facebook. Sa YouTube ko napanood ang videos na kung saan makikitang pagkatapos ma-interview ay sumayaw ang batang umiiyak sa harap ng nagtatawanang studio audience. Nang matapos ang sayaw ng bata ay nainis ako sa sinabi ni Willie na mala-macho dancer ang ginawa ng bata, sabay abot ng P10,000. Teka, alam ba ng bata kung ano ang macho dancer? At sino ang lintek na nagturo nito dito? Mas nainis pa ako nang pinaulit-ulit pa ng host ang pagsasayaw ng bata na sinamahan pa ng kunwari'y mga nagkakagulong babae, habang umaangat ang bahagi ng entablado. Pagkatapos ko mapanood ang mga ito, naisip ko na lang, bakit hinayaan lang ng pamunuan ng Willing Willie at TV5 na mangyari lahat iyon? Kaya hindi katakatakang marami ang nagreklamo sa MTRCB ukol dito.

Palaging sinasabi ni Willie na gusto lamang niyang magpasaya at tumulong sa mga kapuspalad sa pamamagitan ng kanyang programa. Pero hindi ito maaaring gawing dahilan para pagtakpan ang mga nagawang pagkakamali kapag may kapabayaang nangyari.

Sa kasalukuyan ay pansamantalang nagpaalam sa ere ang programa ni Willie Revillame bilang tugon sa mga naani nitong batikos. Maaari rin daw na hindi na ito bumalik. Hindi na ako magtataka kapag iyon ang nangyari dahil ilang beses na ring nakansela ang kanyang mga programang nasangkot sa eskandalo noon.

Hanggang ngayon, hindi pa rin siya natututo.

: (

photo from http://4.bp.blogspot.com/-uMGMy6wxaHI/TZCGvKVBEnI/AAAAAAAAB1I/hfZpzRf8S1o/s1600/jan%2Bjan%2Bwilling%2Bwillie%2Bepisode.jpeg

Watch goalkeeper Rogerio Ceni score his 100th goal

Astig na goalie!

The record-breaking Brazilian goalkeeper scores the 100th goal of his career as Sao Paulo beat Corinthians 2-1.

: )

Ipagdasal natin sila

Tulad ng inaasahan, natuloy ang pagbitay sa tatlo nating kababayan sa China dahil sa droga. Hindi naganap ang himalang hinihintay lalo na ng mga kapamilya ng mga naparusahan ng bitay. Nakakalungkot man ang nangyari, wala naman tayong magagawa dahil pinatupad lamang ng China ang kanilang batas.

Pero ang malaking tanong pa rin ngayon ay kung paano sila nakalabas ng bansa habang may bitbit na droga at hindi man lamang na-detect ng mga nakatalagang seguridad sa paliparan? At kung dito nanggaling ang dala nilang droga, paano ito nakapasok sa bansa in the first place? Mayroon tayong seryosong problema sa mga paliparan at pantalan dito sa bansa. Kung hindi ito mareresolba sa lalong madaling panahon, siguradong may susunod pa sa sinapit nila Sally Ordinario-Villanueva, Ramon Credo at Elizabeth Batain.

Ipagdasal na lamang nating ang kanilang mga kaluluwa at nawa'y magsilbi itong aral sa lahat.

: (

Pasensya

Naranasan mo na bang maubusan ng pasensya? Para bang sumipol na yung takore sa loob mo dahil kumukulo na ang dugo mo. Yung tipong uminit ang ulo mo sa isang pangyayari kaya lumampas sa critical level ang reading ng patience meter mo. At ang resulta: may nagawa kang di mo inaasahan.

May mga pagkakataon talagang hindi mo maiiwasan na susubok sa iyong pasensya tulad ng kapatid na makulit, balitang nakakabwisit, girlfriend na gago, papansing tarantado, chismosang kapit-bahay, asawang sumakabilang-bahay, mataas na presyo ng bilihin, mga pamahiin, masungit na boss, terror prof, buwayang Congressman, walang ginagawang Ombudsman, kausap na slow, basurang TV show, mag-asawang Ligot, bawal na gamot, at kung anu-ano pang masakit sa batok.

Ikaw, nakasakit ka na ba, pisikal man o emosyonal, dahil naubusan ka ng pasensya? Ako, dati, nasagot ko ang Nanay ko dahil may pinagtatalunan kami noon. At kahit pa may punto ako, laking pagsisisi ko nang mahimasmasan ako dahil naisip ko agad na hindi ko dapat ginawa iyon. Madalas kasi kapag malamig na ang iyong ulo ay saka mo lamang naiisip na mali pala ang nagawa mo. Totoong nasa huli ang pagsisisi kapag mali ang desisyon mong napili.

Kahit gaano kahaba ang pasensya mo, darating talaga sa punto na mauubusan ka nito. At kapag nangyari ito, dapat ay kontrolado mo ang iyong emosyon upang hindi ka makapagbitaw ng masakit na salita o magdulot ng masakit na pasa.

: )

Teleserye Remakes

Muling binigyang-buhay ng ABS-CBN ang mga teleserye nito na minsa'y tumatak sa isipan ng sambayanang mahilig sa drama. Nariyan ang Mara Clara at Mula sa Puso. Ano kayang susunod? Esperanza?

Pero bakit kailangan nilang i-remake ang mga ito? Mahirap na bang mag-isip ng bagong konsepto para sa teleserye ngayon? Medyo ayos pa siguro kung binago nila ang kwento mula sa orihinal na serye. Ngunit mukhang remake lang talaga ang ginawa nila. Pareho ang kwento at pareho rin ang mga tauhan. Reklamo nga ng tatay ko, "Napanood na natin dati yan a!"

Oo, alam ko, maaaring ang iba sa inyo ay wala pa sa mundo o walang pakialam nang ipalabas ang orihinal na serye nito. Kaya siguro naisipan nilang i-remake ang mga ito para malaman ninyo kung bakit tumatak sa mga nakatatanda ang mga teleseryeng ito noong unang panahon. Nakatipid na sila sa pag-iisip ng orihinal, sigurado pang may manonood sa seryeng likha nila.

Hindi ko ikakaila na ako'y nanonood din ng teleserye noong ako'y maliit pa. Pagkatapos kasi ng balita, mga teleserye na ang susunod na programa. Dahil na rin sa ilang taong panonood nito, masasabi kong halos parepareho lang naman ang mga teleserye sa Pilipinas. Iba-iba lang ng istorya pero may sinusundang iisang formula. Ang mga pangunahing tauhan sa isang tipikal na Pinoy teleserye ay ang Loveteam, 3rd and 4th party, at ang Kontrabida.

· Loveteam - Bigla na lang magkakakilala si lalaki at babae, tapos ayun, sila na. Minsan naman, magkababata sila at muling nagkita pagkatapos ang mahabang paghihintay ng mga manonood. At kahit anong mangyari, sila ang magkakatuluyan sa dulo ng teleserye.

· 3rd and 4th party - Mga umaasang magiging kanila ang isa sa Loveteam. Hindi kumpleto ang love story pag wala sila. Madalas kaibigan nila ang isa sa Loveteam at may lihim na pagnanasa dito. Medyo kontrabida rin ang papel nila sa istorya pero limitado lamang sa kaagaw nila sa pag-ibig.

· Kontrabida - Syempre, mawawala ba naman ang makasarili, arogante, at doble-karang karakter na nagdudulot ng inis, galit, at problema sa mga televiewers? Trip niyang manggulo sa buhay ng may buhay sa hindi malamang dahilan. Madalas siyang nakukulong o namamatay sa finale.

Sa kanila iikot at tatakbo ang bawat episode ng teleserye, kasama ng ilan pang tauhan na isa-isang mamamatay at ilang sikretong mabubunyag sa kalagitnaan ng kwento. Minsan nga may nawawalan pa ng alaala para lang humaba ang istorya.

Hindi ko alam kung ganyan pa rin ang mga teleserye sa panahon ngayon kasi matagal na akong hindi nanonood ng Pinoy teleserye. Isa kasi ako sa mga kabataang nagsawa dito nang mauso ang fantaserye. At tuluyan ko namang kinalimutan ang lahat ng yan nang sinubaybayan ko ang buhay ni Jack Bauer. Sayang nga lang dahil tapos na ang series after 8 seasons.

: (

No Permit, No Exam

Noong nasa Elementary at High School pa kaming magkakapatid, madalas biktima kami ng lintik na rule na yan tuwing sasapit ang exam week. Hindi na nga kailangan pang sabihin ng teacher na hindi ako makakapag-exam dahil alam kong hindi pa nakakabayad si Mami noong mga panahong iyon. Minsan sa Guidance Office na ako nagte-take ng exam, kung saan hino-hold ang mga test paper until ma-settle ang account. Kasabay ko ditong mag-exam ang ilan pang casualties ng malupit na batas.

Mapalad akong nakapag-aral sa isang pribadong paaralan. Pero kasabay nito ang dagdag pasakit sa aking magulang na mas mataas na bayaring pang-matrikula. Anim kaming magkakapatid. Milyong piso na ata ang na-invest (read: nagasta) ni Mami sa pag-aaral namin. Ngunit hindi ito naging madali. Minsan, late nakakapagbayad ng matrikula si Mami. Minsan nga summer na nya nase-settle ang mga account namin e. Kaya naman palagi kaming natatamaan ng patakaran ng eskwelahan. Pero paano kami nakakapag-exam (kahit late)? Ang sagot ay nasa mahiwagang PROMISORY NOTE.

Sa totoo lang, hindi ko maintindihan bakit kailangan pa ang ganitong patakaran sa mga paaralan. Akala ba nila madaling kumita ng pera? Hindi ba nila alam na hindi naman napupulot ang pera sa daan? May mga panahon naman na nakakaluwag ang mga magulang e. At may mga panahon rin na butas ang bulsa nila Tatay at Nanay. Mahirap bang intindihin yun?

Kung tutuusin, babayaran rin naman talaga ng mga magulang ang matrikula ng kanilang mga anak kasi hindi naman sila makakatuntong sa susunod na baitang kapag hindi sila nabigyan ng clearance, lalung-lalo na sa Finance Department. Kaya bakit kailangan pang ipilit ang hindi patas na patakarang ito tuwing panahon ng pagsusulit? Dahil ba sa wala silang pampasweldo sa mga teacher at empleyado? Weh? Di nga? Sigurado akong mas marami ang nakakapagbayad ng sapat. Yung iba nga fully paid na sa enrolment period pa lang e. Kakaunti lamang na maituturing ang mga may kapareho ko ng kaso. Kaya bakit may NO PERMIT, NO EXAM pa rin?!

Hindi ba't dapat ang pangunahing responsibilidad ng mga educational institutions ay matuto ang mga estudyante nila? Bakit sapilitang pinipigilang makapag-exam ang bata dahil lang sa hindi pa ito nakakabayad ng sapat? Kung pera rin lang ang habol nila sa simula pa lang, edi sana mall na lang ang itinayo nila.

: (

photo from http://profile.ak.fbcdn.net/hprofile-ak-snc4/174598_155386797853235_2142223_n.jpg

Black

Isang araw, nagpa-print ako sa isang computer shop. Nang makita nung clerk na may image ang ipapa-print kong document, agad itong nagtanong.

CLERK: Colored ba 'to?

AKO: Hindi po.

CLERK: Black and white lang?

AKO: Opo, black and white.

...

Then it hit me. Agad kong naisip na dahil sa tanong nya, mali rin ang nasabi ko! May ink ba na puti?!

Kaya simula noon, kapag ako'y may ipapa-print na hindi colored, sinasabi ko agad na "Black lang po."

: )

Bata Batuta

Sabi nila, kung sino pa yung mahihirap, sila pa yung marami ang anak. Sabagay, totoo naman. Sa mga squatter's area lang sa Metro Manila, marami kang makikitang batang pakalat-kalat.

Minsan nakapasok ako sa isang squatter's area sa bandang Fairview para sa isang feeding program. Pagpasok pa lang sa lugar, bumungad agad sa amin ang sangkatutak na batang amoy-araw. Nakakaawa lang yung ibang bata kasi may galis at sugat sila sa iba't ibang parte ng katawan. Pero nakakagulat na sa maliit na lugar na yun, maraming bata ang makikita dito. Paano pa kaya sa ibang mas malalaking squatter's area?

Hindi ko alam kung ang mga mag-asawang nakatira sa lugar tulad nito ay mahilig talaga sa bata o sadyang mahilig lang talaga si mister kaya dumarami ang kanilang supling. Siguro sineryoso nila yung mga huling salita ng pari sa kasal, "Humayo kayo at magparami." Hehehe.

Pero wala namang problema kapag marami ang anak KUNG kaya namang pag-aralin ng mga magulang ang kanilang mga anak. Nakakainis lang dahil may ilan na kahit alam nilang nahihirapan sila sa buhay, anak pa rin sila ng anak. Sa mga bata ako naaawa kasi kapag hindi sila nakapag-aral, lalaki rin silang tulad ng mga magulang nila. Kung makakapagtapos lamang sila kahit na high school, hindi malabong makahanap sila ng desenteng trabaho at tuluyang makaahon sa hirap. Ngunit dahil sa hindi makayanan ng ilang magulang na pag-aralin ang kanilang mga anak, lalong dumarami ang lumalaking mahirap at mangmang.

Sa squatter's area, ang mga tirahan ay dikit-dikit, maliit, at masikip. Iilan lamang ang kongkreto at karamihan ay yari sa tagpi-tagping light materials - karton, plywood, yero, at gulong na pabigat rito, kaya kapag minalas na magkasunog, madaling maabo ang mga tirahan dito. Ngunit nakapagtataka na sa liit at sikip ng mga tirahang ito, nagagawa pa rin ng mga mag-asawa na gumawa ng bata. Sabagay, kung gusto, may paraan, kahit kumot lang ang harang.

Maaaring may maitulong dito, sakali mang maisabatas ang Responsible Parenthood Bill o ang Reproductive Health Bill. Pero kung tutuusin, common sense na ito sa mga mag-asawa, lalung-lalo na yung mga mahihirap. Dapat sa sarili nila mismo, alam nila kung ilang anak lamang ang kaya nilang suportahan. Hindi yung anak sila ng anak at bahala na ang nasa itaas bukas.

: )

Raymond, ang taba mo!

Bakit ba ako tumataba? Maraming nagsasabi na ako'y tumataba. Masama bang tumaba? Hindi naman, di ba? Napansin ko ring ako'y tumaba kasi una, sumikip ang mga pantalon ko. Pangalawa, umabante ng dalawang butas yung sinturon ko. At pangatlo, naging fit ang ilang damit kong hindi naman dapat body-fit. Bwisit.

Pero bakit nga ba ako tumataba? Di naman ako buntis. Wala ring nagbago sa aking eating habits. Kung gaano karami yung kinakain ko noong 32" pa lang ang waistline ko, ganoon pa rin naman karami ang kinakain ko ngayong... (kumuha ng measuring tape at sinukat ang...?!) ngayong 35" na ang waistline ko. Wow, 3 inches din yun a. Anyway, malakas talaga ako kumain kahit noon pa. Ako yung tipo ng taong pag may handaan, puro ulam ang laman ng pinggan at kanin ang nagiging ulam. Malakas talaga ako kumain. Bukod kasi sa standard 3 meals a day (breakfast, lunch, and dinner), e palaging may meryenda in between meals pa. San ka pa? Pero sa kabila nito, hindi naman ako tumataba noon. Ngayon lang. Seryoso.

Ngunit bakit nga ba ako tumataba? Hindi naman ako napabayaan sa kusina noong noche buena. May teyorya ako pero hindi lang ako sigurado kung tama. Sa tingin ko kasi kaya ako tumataba ay dahil hindi na ako nase-stress. Yes, I think it's stress. Maraming cause ang stress. Pwedeng itsura mo, trabaho, pag-aaral, at iba pa. Pero sa kaso ko, stress na dulot ng lovelife. Oo, na-stress ako sa girlfriend ko dati. Sa awa ng Diyos, mag-aapat na buwan na akong walang iniisip na masakit sa dibdib. Palagay ko kasi noong madalas akong mag-isip at mag-alala tungkol sa relasyon namin ay di ko napapansing naaapektuhan na pala ang aking kalusugan, kaya kahit kain ako ng kain e hindi naman ako tumataba. Kaya naman ngayong wala na akong iniisip at inaalalang masakit sa dibdib, lumalabas na rin ang epekto ng normal kong pagkain.

At dahil ako'y mataba na, nais kong magpapayat na para pantalon ko'y di na masikip at damit ko'y di na fit.

: )

photo from http://www.bluemarigold.ca/uploads/Image/interface/measuring%20tape.jpg

Valentine's Day na naman

Love is in the air na naman. Panahon na naman ng pagmamahalan. Para sa mga katulad ko, ordinaryong araw lamang ito. Wala nga akong makitang love sa air e, hehe. Ngunit para sa mga may karelasyon, espesyal ang araw na ito. At dahil dyan, muling kumita ang mga nagtitinda ng bulaklak, tsokolate, balloons, teddy bear, at kung anu-anong may kinalaman sa Valentine's Day.

Maraming text messages at wall posts na naglalaman ng pagbati tungkol sa Valentine's Day ang ipinadala't natanggap ng mga taong may cp at fb. Samu't saring impormasyon rin tungkol sa pag-ibig at Valentine's ang makukuha sa mga TV segments at articles tulad ng binabasa mo ngayon.

Ilang kasalang-bayan ang ginanap sa iba't ibang lugar upang mabawasan umano ang mga nagli-live-in, lalo na yung mga may anak na. At ang tanging masasabi ni Mayor pagkatapos ng kasal, "Wag nyo pong kakalimutan sa susunod na halalan ang nagbigay-daan upang kayo ay malibre sa kasal."

Iba-iba rin ang mga pakulo sa iba't ibang dako ng mundo para sa selebrasyon ng Valentine's Day. Nagtataka nga ako bakit walang Lavapalooza ngayong taon. Akala ko pa naman ito'y isasabay sa Earth Hour.

Nagkalat rin ang libreng condoms dahil sabi nga ng mga namimigay nito, "Spread the love, not the virus." At ayon sa ating bubwit, fully-booked na naman ang mga motel ngayong gabi. Yung iba, sa likuran na lang raw ng taxi.

Ano man o sa paanong paraan man ninyo ipinagdiwang ang Valentine's Day, sana hindi natin nakalimutan kung bakit ito naimbento ng kung sino man. Pag-ibig ang dahilan. Ang lust ay iba sa love. Hindi sukatan ng pagmamahal ang sex, tandaan nyo yan mga iha. Pag ayaw mo at kinulit ka ng bf mo, sipain mo sa bayag.

Kaya in a relationship ka man o single, it's complicated or married, engaged o [insert text], nawa'y naging masaya ang araw na ito para sa ating lahat.

Happy Valentine's Day!

: )

Gloc 9 feat. Sheng Belmonte - Walang Natira

Napakagandang kanta.

: )

MTV Cribs: Manny Pacquiao

Ang ganda ng bahay. Ang daming picture frames. At ako yung nahihirapan sa pag-eenglish nya. Hahaha!

: )

Talentadong Showtime

Dati, paborito kong panoorin yung Talentadong Pinoy sa TV5 kahit pa alam nating lahat na ginaya nito ang Got Talent. Ito rin ang dahilan kaya napilitan kunin ng ABS ang Got Talent franchise kaya't nabuhay ang Pilipinas Got Talent.

Anyway, maganda ang naging takbo ng Season 1 hanggang sa matapos ang Grand Finals. Nang magsimula ng Season 2, ang daming nagbago. Ngayon, sa tuwing napapanood ko yung Talentadong Pinoy, hindi na Got Talent ang naiisip ko kundi yung Showtime. Seryoso.

Ilan sa mga napansin ko ay, tulad sa Showtime, tuwing nagko-comment ang mga judges, palaging may mga kung anu-anong sound-bites na maririnig. Isa pang nagaya nito sa Showtime ay pwede na sumali ang isang kuponan lalo na ang dance groups. Yung napanood ko nga kanina parang XB GenSan e.

Ang isa pang hindi ko maintindihan sa Season na ito ay yung mga nagwawalang audience. May P10,000 kasi na naghihintay sa isang lucky member ng audience na mapipiling "Reaction of the day" winner. Ayos lang sana pag singing o dancing acts. Pero minsan, kahit spray paint art lang yung act, nagwawala pa rin yung audience. Parang wala sa lugar yung reaction nila. Para lang sa P10,000. Mas maganda sana kung tanggalin na nila yung "Reaction of the day" para maging natural naman yung reaction ng audience. Pilit e. Nakakainis. At kung gusto talaga nilang may manalo ng P10,000, mag-isip sila ng ibang promo na hindi na kinakailangan ang mga hindi natural na reaction. Magpa-sample sila. Hehe.

At least sa Showtime, makikita mo kung nag-enjoy ba o hindi ang audience sa napanood nila.

And speaking of Showtime, babalik rin pala ito sa 10:30 time slot dahil isang bagong noontime show raw ang niluluto ng Dos. Hay, baka ma-Bulaga na naman yan sa ratings at maging Lose na Lose. Hehe.

: )

photo from http://pinoysgottalent.com/files/2010/10/talentadong-pinoy.jpg

Epekto ng pagsabog sa bus

Kahapon pagsakay ko ng bus pauwi, napansin ko agad na halos lahat ng pasahero ay nakatingin sa mga bagong salta sa bus, tipong kinikilatis kung may kadudaduda sa amin. Pag may bumababa naman, napansing kong may ilang pasahero na nililingon ang nabakanteng upuan at sinisilip kung may naiwang bagahe sa ilalim nito.

Dahil sa nangyari sa Makati noong Martes, marami ang naging mas maingat at alerto sa paligid. Bigla ring naghigpit ang seguridad sa mga matataong lugar tulad ng malls, train stations, at ngayon pati mga bus terminals. Pero kailangan bang may mangyari munang hindi kanaisnais bago tayo kumilos at mag-ingat?

Totoong mahirap bantayan ang mga pampasaherong sasakyan dahil wala namang guard na nagtutusok-tusok sa bag mo bago ka makasakay. Abala pa nga yun kung tutuusin lalo na pag rush hour. Kaya naman nakasalalay mismo sa mga pasahero, driver, at kunduktor ang kaligtasan ng bawat isa sa loob ng sasakyan. Kailangan ng ibayong pag-iingat. Kailangan maging alerto. Wag ka lang mapapraning.

Sabi nga nila, kung nais talagang gumawa ng masama ang isang tao, gagawa at gagawa ito ng paraan para maisakatuparan ito. Ganyan mag-isip ang mga terorista. Pero kung mahigpit ang pinapairal na seguridad at sapat ang iyong pag-iingat, maaaring maiwasan ang mga hindi inaasahang sakuna.

Huminto ang bus dahil may bababang pasahero. Nilingon ko ang nabakanteng upuan at sinilip kung may naiwang bagahe sa ilalim nito. Nang may ilang pasaherong sumakay, tiningnan ko ang mga bagong salta sa bus at kinilatis kung may kadudaduda sa kanila. Mukha namang wala dahil nakauwi ako nang ligtas.

: )

SMART Unlimited (?!) Calls

May nakita na naman akong tarp ng promo ng SMART, yung SMARTTalk20 Unlimited Calls na tulad ng iba nilang unlimited promo dati ay hindi talaga unlimited. Sa halagang P20, may unlimited calls ka na raw sa up to 6 SMART/TNT friends. Anim lang.

Unli ba tawag dun?

Naalala ko may unli call promo rin sila dati na tuwing madaling araw lang pwede ma-avail, kung kailan tulog ang nakararami. At meron pang isang unli call promo na every 5 minutes naman ay mapuputol ang iyong tawag.

Unli ba tawag dun?

Sana naman sa susunod, panindigan nila yung pagiging Unlimited ng mga Unli promos nila. Dahil kung hindi, Unli pa ba dapat itawag dun?

: )